Lateef Raji
Béèyàn ò bá fàná ṣòfò
Kò níí fèní ṣẹ̀sín
Báa bá wẹ̀kun ayé
Tá à rì
Táa gun gègéle
Tá à já bọ́
Tí a rin pẹ̀tẹ́lẹ̀ ilẹ̀
Tá à rá
Tá ṣe kòńgẹ́ afẹ́fẹ́
Tó pa ọ̀pọ̀
Táa yè é
Báa bá rántí orí, rántí ẹlẹ́dàá
Tó gbeni, sààbò ẹni
Báa bá gbè fórí, fìyìn fẸ́lẹ́dàá
Kò léèwọ̀.
“Ayé lọjà”
Ọ̀rọ̀ àwọn bàbá wa
Báa bá wáyé nájà jèrè
Kì í ṣagbára
Ọ̀pò ló wáyé
Wà láàyè bí aláìsí
Orí tó gbeni
Lè ṣàtakò ẹni
Orí tí yóò gbè irú yín
Ló jẹ́ ẹ nájà jèrè dọjọ́ alẹ́.
Bẹ́dàá bá ronú jinlẹ̀ áá mọ̀
Ká tó dáyé laláyé ti ń ṣayé
Nígbà táa dáyé, à ń bá wọn ṣayé
Ẹ̀yín bá wọn ṣayé
Ẹ tún ń ṣayé ire
Báà bá sí láyé, aláyé a ṣayé
Ayé ò dúró
Lèrò yín ò fi dúró
Lórí à ti gún ayé lẹ́ fi dọlọ́pọ̀ èèyàn
Ayé ti ń kọrin,
Kẹ́ẹ tó dolórin
Ohùn ọ̀tọ̀ lorin yín fi dùn yàtọ̀ létí ọmọ ènìyàn
Ayé ti ń rọ́tàn
Kẹ́ e tó donítàn
Ìtan ò dùn bíi ká mò ọ́ rọ́
Orin dùn lẹ́nu baba
Ìtán dùn lẹ́nu àgbà òpìtàn
Bọ́rò ayé bá dàrú
Ẹ pọmọ Fálọlá kó fìtàn tún un tò
Ibi bàtà gbé ń tani lẹ́sẹ̀
Ẹní wọ̀ ọ́, ló mọ̀
Bó bá di ọ̀rò ogun Ìjàyè
Ògúnmọ́lá ni wón ní á bi
Bọ́rọ̀ bá dọ̀rọ̀ ìlọsíwájú ayé
Baba rere ni ẹ jẹ́ á bi léèrè
Ẹní mọ̀ ọ́ wò bí ọlọ́mọ ò sí.
Baba mọ̀ràn, mọ̀tàn, mẹ̀tọ́, mètò
Niná ọlá, iyì baba
Fi ń fojoójúmọ́ gòkè
Ọlá ìbí wá ń kún
Ọlá ibi a gbé bí baba
Ẹ wáá di Ọmọ́kọ́lá
Tí ọ̀rọ̀ rẹ̀ ń fojoójúmọ́ yàn
Béèyàn ò bá fàná ṣòfò
Kò níí fèní ṣẹ̀sín
Ẹ ẹ̀ fi àná yín ṣòfò
Lẹ fi di funfun inú ẹyẹlé
Tọ́mọ aráyé ń fojoójúmọ́ wá kiri
Aṣọ àlà tí ẹ wọ̀
Ọmọ aráyé ò ní da epo sí i.